Meld svindel til politiet

Det er krevande å etterforske bedragerisaker, og politiet legg bort mange av dei. Svindlarar bruker avanserte, digitale metodar for å skjule spora sine, dei kriminelle sit kanskje i utlandet, og utbyttet blir raskt kvitvaska. Sjølv om politiet legg bort mange enkeltståande bedragerisaker,  betyr ikkje det at saka er ute av verda for dei. Med den nye bedragerieininga til Økokrim grip politiet fatt i sakene på ein annan måte.

– Politiet tek opp igjen saker dersom vi avdekker mønster og bakmenn. Vi forstår godt at det kan vere tungt å melde ei svindelsak til politiet dersom dei legg henne bort etter kort tid. Men no jobbar vi med desse sakene på ein ny måte, seier fung. Økokrim-sjef Inge Svae-Grotli.

 

Bedragerieininga skal analysere saker på tvers av politidistrikt for å komme fram til bakmenn og avdekke modus. I tillegg er det viktig informasjon i meldingane, som Økokrim bruker til å førebygge kriminalitet og bidra til lukke sårbarheiter. Eitt eksempel er det førebyggande arbeidet som er gjort saman med  telebransjen, slik at teletilbydarane no har forbetra systema sine og stoppar millionar av svindeltelefonar. 

 

Antal politimelde økonomilovbrot auka frå 30 680 i 2023 til ca. 34 400 i 2024, ein auke på 12 prosent. Det skuldast primært veksten i antal bedragerimeldingar, som auka med 13,5 prosent.

 

Ein stor del av meldingane om bedrageri gjeld digital svindel. Det kan for eksempel vere tilfelle der svindeloffer har blitt lurte til å overføre pengar frå nettbanken, trykke på lenker og gi frå seg bank-ID. Dei tre svindelkategoriane politiet ser mest av i 2024, er annonsebedrageri, som er at du betaler for ei vare du ikkje får, SMS-svindel eller phishing og investeringsbedrageri, der du blir lurt til å tru at du investerer i noko reelt. 

 

Dei største økonomiske tapa finn vi i investeringssvindel, der folk blir lurte til å investere i ulike investeringsobjekt, ofte kryptovaluta. Økokrim registrerte 251 millionar kroner tapt via investeringsbedrageri i 2024. Dette er ein auke på 41 prosent frå 2023.

 

Den største auken i antal saker er likevel dei med mindre tapsbeløp, under 200 000 kroner. Dette er ofte massebedrageri som er utførte av profesjonelle, kriminelle nettverk som spesialiserer seg på svindel. Derfor er det òg vanskeleg å etterforske slike saker enkeltvis. 

– Mange av bedragarane opererer frå utlandet, der dei sender ut masse-SMS-ar til tusenvis av menneske samtidig. Derfor er det avgjerande at vi fokuserer på å avsløre og stoppe bakmennene, noko vi aktivt jobbar med gjennom innsatsen til bedragerieininga vår, seier Svae-Grotli.

 

Politiet jobbar med å få på plass ei løysing for å melde bedrageri til politiet på nettet. 

– Politiet må vere datadrivne,  spesielt når kriminaliteten ikkje kjenner grenser og er digital, seier Svae-Grotli.